بنت الأبرز
 01:58 AM
 23.01.08

الموضوع باين من عنوانه حبيت افتح موضوع علشان نرمس فيه عن
برنامج شاعر المليون وآخر اخباره وكل واحد يقول الي بخاطره عن
البرنامج والشعراء ويبدي رأيه بلجنة التحكيم ويقول من يتوقع يفوز
من المرشحين
ارجوا التفاعل مع الموضوع

 إضافة رد

 سلطـــان
 03:30 AM
 23.01.08

واللة موضوع من اول استغربت
ان محد كتب عنة




اما بنسبة للي ودي يفوز
واحد من الثلاثة


اذا مو ناصر الفراعنة

خلف المشعان

واذا مو خلف المشعان

خليل ابراهيم العنزي



ولجنة التحكيم

كلهم شي
بس تركي المريخي
ودي يشوتونة

مايعرف ينتقد
ولا يعرف يسولف

يعني قاهرني




تريونا


يعطيك العافية على هالموضوع

 إضافة رد

 عقيدي وأفتخر
 07:23 AM
 23.01.08

السلام عليكم ،،


شاكر لك عزيزتي

بنت الابرز ،،

على طرحك للموضوع المميز ،،

وان شاء الله الي بياخذ البيرق

خلف المشعان العنزي
او

الفـرآآآآآآآآآآآآعنـة

المشاركة الأصلية كتبت بواسطة :
ولجنة التحكيم

كلهم شي
بس تركي المريخي
ودي يشوتونة

مايعرف ينتقد
ولا يعرف يسولف

يعني قاهرني

حـرآآآآم عليك

بالحيف على ابو مشاري

والله زين احسن واحد هو

انا ودي يطردون بدر صفوق

ابو مشاري بحارتنا ومشاري ولده يدرس معي هههههه

بالعكس محترمييييييييين

 إضافة رد

 صادق الوعد
 07:38 AM
 23.01.08

مشكورة بنت الابرز على الموضوع

بس أنا انقطعت عن البرنامج لاني عند امتحانات

ومعرف عنه شي

بس بصراحة حبيت شعر صالح آل مانعة المري

فمدري إذا هو للحينه موجود

وإلا طلع

إذا موجود ياليت تطمنيني

وشاكر لك مسبقاً

وأعتقد ان اللي راح يا خذ المليون هو ناصر الفراعنة

لانه محطم الدنيا

 إضافة رد

 بوعيسى
 01:57 PM
 23.01.08

السلام عليكم


مشكوره بنت الابرز على الطرح المميز


وانا عندي عنصريه واتمنى البيرق مايطلع من ديرتي قطر


وارشح الشاعر خليل بن ابراهيم الشبرمي التميمي او عايض بن هداف القحطاني

اما بنسبه للفراعنه له اسلوب غريب في الشعر ولكن لايعجبني

اما بنسبه للجنه امس كان اسلوب الدكتور غسان مب حلو مع الشاعر المورتاني

يجب على اعضاء اللجنه ان يكون لديهم اخلاق كبيره واسلوب جيد

 إضافة رد

 سراب
 02:34 PM
 23.01.08

أنا كنت متابعه الموسم الأول كان ممتع
أما الموسم هذا ماتابعته
أحسه ملوع جبدي وين ماتروحين الناس حاطه على قناة شاعر المليون
تلاقين الواحد حافظ كل القصايد من كثر الإعاده
أحس مابقاله طعمه


مشكورة عزيزتي وماقصرتي

 إضافة رد

 بنت الأبرز
 02:43 PM
 23.01.08

تركي المريخي صادق ما عنده سالفة كله فالك البيرق وفالك البيرق
وجوده مثل عدمه
وانا بعد اتوقع الفوز بيكون من حليف ناصر الفراعنه
مع انه ما يعجبني شعره واحس في من هو ابغ منه
لكن هو ما كل الجو وكل العالم متوقعين له الفوز
بالنسبة لكلمة تريونا
عادي اخوي هاي كلمة اماراتية بحته ما فيها شيء ؟؟

 إضافة رد

 بنت الأبرز
 02:46 PM
 23.01.08

عقيدي وافتخر
اشكرك على الرد
وانا اضم صوتي لصوتك
هذا بدر يبط الشبد ما ينبلع
خجاج
اما اللي يعجبني واحس انه احسن واحد فيهم
سلطان العميمي
يعني حيادي وماشيء على مبدأ نقدي مع الكل
ويحلل بموضوعية والله فنان

 إضافة رد

 بنت الأبرز
 02:47 PM
 23.01.08

صادق الوعد
اشكرك على الرد
وترى طافك الكثير الحق تابعه

 إضافة رد

 بنت الأبرز
 02:51 PM
 23.01.08

اشكرك على الرد
وان شاء الله يتحقق املك وما يطلع البيرق من ديرتك قطر
وبالنهاية اللي يستحق هو اللي بيرفعه
وأما بالنسبة لغسان والي سواه بالموريتاني
بصراحه انا كنت احترم غسان لين امس
بصراحة طاح من عيني كان اسلوبه متعجرف مع الشاعر الموريتاني
على وشهو شايف عمره يعني اذا من لجنة التحكيم يسفل بالعالم

 إضافة رد

 بنت الأبرز
 02:53 PM
 23.01.08

سراب اشكرك على المشاركة
ترى فاتج والله حتى السنة حلو
احسن من البرامج
اللي تولعوا فيها العرب ستار اكادمي وطخته

 إضافة رد

 بنت الأبرز
 02:56 PM
 23.01.08

شو رايكم بغسان امس واللي سواه
بالشاعر الموريتاني
وشو رايكم بالشعراء اللي يمدحون الشيوخ
وخاصة اللي مب من ديرته مثل
السعوددين والكويتيين الي يمدحون محمد بن زايد وشيوخ الامارات
هل هي طريق اعلامي للاسترزاق؟؟او الطراره
ما ادري ليش ما يمدحون شيوخهم
صراحة انا عجبني امس الشبرمي يوم مدح امير دولة قطر
وانا ارشحه بقوة لنيل البيرق

 إضافة رد

 سراب
 03:20 PM
 23.01.08

بنت الأبرز
أنا بعمري ماشفت ستار ولاغيره ولاتعجبني البرامج الهابطه
بس إنهم حطوا قناة فضائية خاصه للمليون وأربع وعشرين ساعه إعاده
هي يمكن تنفع اللي تطوفهم حلقة أو شاعر
أما الواحد طول مو قاعد مقابل هالمحطه أربع وعشرين ساعه
شي يطيب النفس
أحس الشي لما ينعاد ينكره


وبالنسبه لطرحج ليش الشعراء يمدحون محمد بن زايد
فحسب وجهة نظري مافيها شي لأنه هو صاحب الفكرة وراعيها

أما ان واحد يمدح شيخ ثاني غير شيخ ديرته أنا أشوف مالها داعي
ليش مثلا مايمدح شيخ الديرة اللي ينتمي لها أولى من الغير

يمكن من باب شد الناس عشان التصويت يكون ضامن أهل ديرته
ويبي شعب الديرة اللي مدح شيخها يصوتون له
الله أعلم عن النيات!!!

 إضافة رد

 سلطـــان
 07:16 PM
 23.01.08

شفتوا الظلم اللي امس



حرام واللة الشبرمي شاعر كبير صح

لاكن امس ماكانت قصيدتة بمستوى المسابقة


وتمنيت يكون التحكيم بالقصيدة مو بسم الشاعر




البيق اللي مع ابن افطيس ماني خلف كان ماجيبة


كفوا يا خلف




تريونا

 إضافة رد

 altheeeb
 08:06 PM
 23.01.08

لا تعليق
لاني ما افهم بالشعر
ههههههههههه

 إضافة رد

 سلطـــان
 08:52 PM
 23.01.08

سراب المدح اللي بمحمد يستاهلة


لان اول من يوم نجلس على التلفزيون رقص واغاني بصراحة

الان اغلب القنوات اتجهت لشعر صار فية تنوع بالقنوات



شي يطفش


لاكن فكرتة يستاهل اللي ينقال فية واكثر




تريونا

 إضافة رد

 بنت الأبرز
 08:55 PM
 23.01.08

حبيبة قلبي شكلك زعلتي ؟؟
انا ما اقصدج انتي بستار اكادمي انا اقول خل العالم ينشغلون بهالبرامج
احسن من برامج ستار اكادمي
لكن بالنسبة للاعاده معج حق
ومدح الشيوخ رايج واحترمه
اشكرج على الرد وما تنلامين صايرة زعول
لكن انا اعذرج ما تنلامين

 إضافة رد

 عبدالعزيز الدميمي
 01:31 AM
 24.01.08

أولا تسلمين
على الموضوع المميز
ختي بنت الأبرز
وبالنسبة لجنة التحكيم كثر من مثالية
دون تحيز
وبالنسبة للشاعر الي أرشحه وأتمناه يفوز
هو خلف مشعان

 إضافة رد

 سراب
 05:24 PM
 24.01.08

شدعوه حبيبتي أبي أزعل منج انتي لاوالله

وصدقتي هو شغل الناس عن البرامج الهابطة

وبالنسبة إني صايرة زعول لا مو لهالدرجة
بس بيني وبينج أحس نفسي دايم متوترة وماأتحمل شي
وأحاول قد ماأقدر أريح نفسي وأخاف أقعد بروحي
مو خوف من شي بس أحس تصيبني ضيقه

ورغم كل هذا مستحييييييييييل أزعل منج
وعلى شانج اليوم شفت الإعاده مال حلقة الثلاثاء الماضي
بس مو كلها لان مالي خلق عليها كلها
ضحكني الشاعر اللي قط عقاله وغترته لما اندمج بقصيدته

مشكورة على جهودج حبيبتي
ويالله نستد فيج إذا في شي مميز تخبرينا
ونشوف الإعاده

تقبلي تحياتي

 إضافة رد

 بنت الأبرز
 01:59 AM
 25.01.08

هي والله هذا الظفيري اظن
يموت من الضحك مسكين غترته
شوي شوي اطيح وغربلته قال لا
ما يستوي زين سوى شلها بس شكله
كريه بدون الغترة
صج انها تعطي هيبه وتخش بلاوي
اشكرج حبيبة قلبي

 إضافة رد

 صادق الوعد
 05:40 PM
 02.02.08

لا أن شاء الله

البيرق أن ما كان قطري

بإذن الله سعودي

يعني لا حدا يزعل بس الاماراتيين وينهم ووين الشعر

وأكبر دليل الشعراء المتواجدين بالمليون الحين

وكلامي مو لاني سعودي بس هذي حقيقة ولازم الكل يعرفها

والبيرق بعون الله سعودي

 إضافة رد

 بنت الأبرز
 01:24 AM
 03.02.08

صج في شعراء سعوديين وقطريين على مستوى
لكن البيرق اماراتي السنة والمنهالي ما عليه قصور احسن منهم كلهم

 إضافة رد

 صفوان الفارس
 07:59 PM
 03.02.08

بسم الله الرحمن الرحيم

مسا الخير على ابناء العمومة جميعا

اود ان اشاركم في طرح فكرة شاعر المليون بصراحة بعد ان قرأت جميع ملاحظاتكم ... بصراجة فكرة جميلة ورائعة من الاخت بنت الابرز مشكورة عليها .... بصداحة ها البرنامج فرض نفسه في كل مكان ندخل نرى قناة شاعر المليون والواحد مل من البرامج الهابطة التي نراها في القنوات الاخرى ...
وكل برنامج عندما يبدأ يكون له بريقه برأيي الشخصي الموسم الثاني للبرنامج اقل من الاول ولكن هذا لا يعني ان هناك شعراء مخضرمين كالفراعنة والشاعر الكبير ذو الشخصية المميزة الشاعر القطري خليل الشبرمي ... انا بخصوص مدح الشيوخ فكل شخص يفتخر بلابته وبقبيلته وله حق الفخر اما من يمدح غيره فهي من باب رد الوفاء من الشعراء لان اغلبهم لم يكن معروف فشاعر المليون ابرزهم....
وعندي ملاحظة او اقتراح وخاصة للاخ ابو طلال لماذا لا يتم عمل سمابقة شعرية بين الاخوة وصاحب القصيدة الجميلة والي تفوز بالمركز الاول حسب رأي القائمين على الموقع يتم تكريمه...
وبهذه المناسبة اود ان اهديكم قصيدة كتبها على الماشي:

@@@@

يجينا الليل والعين تناظر الشاشة بكل الاحوال

وكلن فينا ياربعي من التلفاز لابد ياخذله جوله

وتشوف من زين ما خلق ربك شيٍ يطيب البال

قناةٍ للصبح تردح ردح العمارة وتقرع طبوله

وقناةٍ تحكي واقع الأمة وتنقل واقع عربنا والاذلال

من غزة لبغداد تشوف الهوايل وفنون الذل وذهوله

وقناةٍ تصنع لنا من ردين الافعال والشينين أبطال

وتبخس حق الابطال ورجالن لها تاريخ وبكل سهولة

وقناةٍ صارت حديث الناس بطلة فلانة ولبسها زلزال

طير عقول شيبان وشباب ودمر حتى معنى الطفولة

ويبقى شاعر المليون شيٍ يريح البال ويطرب الرجال

نسمع قصايد في زمن ياربعي ضاعت فيه الرجولة@@@@

وسلامتكم

صفوان اسعد الفارس - الكويت

 إضافة رد

 بنت الأبرز
 11:15 PM
 03.02.08

اخوي صفوان اشكر مشاركتك
والقصيدة الجميلة وبصراحة اقتراح حلو
انا آمل ان تكون هناك جائزة مالية اسوة بالبرنامج الاصلي طبعا مب مليون ولكن
مثلا 10000آلاف درهم تكون مساهمة من اعضاء ادارة المنتدى جميعا
وان شاء ابو طلال ياخذ الموضوع بعين الاعتبار

 إضافة رد

 بنت الأبرز
 08:06 AM
 06.02.08

شو رايكم بحلقة امس
مبروك تأهل هلاله على الاقل تمثل العنصر النسائي
مع ان شعرها مب لين هناك بس وين تروح في موجه الشعراء

 إضافة رد