تسجيل جديد
اختر لونك المفضل
مجلس الـشــعر والـشـــعــــراء>شـــــــــــــاعــــر وقـصـيــــــــــــــــــــــــدة
 الشويطي
 02:22 AM
 08.10.06
الشاعر مبارك أبو حيمد من اهالي الحريق شاعر معروف له قصيده مناسبتها ان المذكور اعتاد وقت الربيع ان يخرج للبر والاجتماع مع اهل البادية حيث كان المذكور صاحب إبل وصاحب نخيل (مزرعة) ويحب الاجتماع بأهل البادية وتبادل السوالف على القهوة وما تطرقه هذه السوالف من شعر وقصص مسلية وعلوم رجال يستفيدون منها وفي إحدى الليالي شب ناره وانتظر ان يشاركه أحد القهوة ولكن كان كل مشغول بحلاله وأموره الخاصة وقد عرف ان القهوة بدون جمعه لاطعم لها وليس لها ذوق فاخذ ينشد ويصف قهوته في قصيدته حين يقول:
يادلتي ياللي من البن والهيل

دايم على جمره صبورن لضيه

وافرح اليا جوني فحول الرجاجيل

والدله الصفرى قبلها ملييه

والزعفران اخضاب هيل بلاكيل

لاجيت ابهر ما بنفسي رديه

يادلتي وين الرجال الحلاحيل

اللي سوالفهم قبلها عذيه

ياما جلسنا بين حمر الغراميل

وقت الربيع اللي فياضه رويه

احمس وادق النجر بالصبح والليل

مع النشاما والسوالف طريه

في البر والا بين غرس مظاليل

مافيه غير ارباعتن صيرميه

والمسح ترعى العشب في حاير السيل

نشرب لبنها كل صبح وعشيه

واليوم افكر وين ربعن مشاكيل

تفرقوا كل ضرب له نحيه

ربعن على درب المراجل دواليل

والكل منهم مايبور بخويه

ابكي على ربعي ولافي يدي حيل

من بعدهم صارت عيوني شقيه

من لامني جعله يشوف الغرابيل

حتاه ما يزرى وينقد عليه

يادلتي عسى الليال المقابيل

نعيد ما ضينا ليالن شليه

وصلاة ربي عد وبل الهماليل

على النبي رسول رب البريه
 الدليمى الانبارى
 03:04 AM
 08.10.06
بارك اللة فيك على هذا الشاعر والقصيدة الزينة
 الشويطي
 03:45 AM
 08.10.06
شكرا أخي الدليمي على مرورك الطيب والتعليق

تقبل تحياتي وعسى الله لا يحرمنا من طلاتك
 علي الساري
 01:07 PM
 08.10.06
صح لسان الشاعر
وتسلم ايدك يالشويطي
 سراب
 03:56 PM
 08.10.06
اللهم صلي وسلم على نبينا محمد

صدق الشاعر فالقهوة لاتشرب إلا بوجود الصحبة

سلمت يمينك على هذا النقل المميز
Up