أحمد القرعاني
 11:53 AM
 26.11.10

هذه القصيده لرجل اسمه جحيش بن مهاوش الهشال كان عنده ثلاث عيال اكبرهم اسمه علي هذا الشايب كبير بالسن وقبل كان قاضي بين عشيرته وجماعته ولكن كبر بالسن وقام ما يقدر يقضي حاجته ويالله على بابكم وليش ما يصير عندهم شح بأرضهم ويجتمع علي وأخوانه وقالهم انا بروح اشوفلي ارض علشان نرحل انتم تجهزوا بعد ثلاث ايام ان ماعودت لكم تجوني بالمكان الفلاني الزبده مشى علي وليه ما يجتمعن نخرات السوء على انهن يكلمن ازواجهن يتركون الشايب بمكانهم ويقولون لعلي انت مشيت منيه هو مات منيه
الزبده والحريم كلن تحشي براس زوجه وثلاث ايام لين وافقوا الاثنين وحرمت علي والله ويوم واجهوا علي قالوا السالفه كيت وكيت
ليش ما الله يجيب اثنين متخاصمين على حق وقالو واحد منهم مافيه الا ابو علي يحل المشكله ما يدرون انه كبر والله ويجون لمير ما يلقون الا خرابه واحد قال يا رجل هذا مبين انهم راحلين قال لاقرب شوي ولذاك الشايب السلام عليك السلام قالوا ما عينت لنا القاضي فلان قال انا قال ليش كذا صارلك وين عيالك قال والله عيالي رحلوا وخلون قالوا امش نوصلك قال لله والله ما اخطي يا بن الحلال نوديك لعيالك قال اذا انتم صج تبون تخدموني وصلوا هالابيات هذي لعلي





قـال الـذي يقـرأ بلـيـا مكاتـيـت
يلـي تقـرون العمـى مـن عمـاكـم
يا عيـال ياللـي تشرفـون المراقيـب
تريضولـي واقصـروا مـن خطاكـم
خذوا كـلام جحيـش مابـه نكاذيـب
مثـل السنـد مضمـون للـي وراكـم
ويا عيال وان صرتوا ضيوف ومعازيب
ترى الكـلام الزيـن ملحـت قراكـم
وترى البلاسه مـن كبـار العذاريـب
تـرى البلاسـه مـا تطـول لـحـاكم
يصيـر بعيـون الرفاقـه تقـل شيـب
ليـا منـه اقبـل قيـل هـذا بـلاكـم
المذهب المذهب ترى المذهب الطيـب
وترى رديء المذهـب يبـور نساكـم
يـا عيـال مـا سرحتكـم للمعازيـب
ويا عيال ما عمـر المعـزب ولاكـم
يا عيـال مـا ضربتكـم بالمشاعيـب
ولا سمعـوا الجيـران لجـة بكـاكـم
يـا تسعـرت الخلايـق تقـل ذيتـب
اريـد مـن صيـد البـراري غذاكـم
وياما قطعت مـن الفيـاض العباعيـب
من خوف ما يقصـر عليكـم عشاكـم
احفيـت رجلنـي بحامـي اللواهيـب
وخليت لحـم الريـم خالـط عشاكـم
واليوم شوفوا لحيتـي كلهـا الشيـب
وشوفوا محل تخوضعي فـي ذراكـم
قمـت اتوكأفـوق عـوج المصاليـب
وقصرت اخطايا يـوم طـات خطاكـم
يا عيال يـا عيالـي عليكـم مطاليـب
عطوني القرضـه جـزا مـا وتاكـم
خوالكم يا عيـال هـم ماكـر الطيـب
ولو تتبعـون الجـد محـد(ن) شناكـم
يا عيال يا عيـال الخنـا كلكـم عيـب
ياعيال مدري كل هالردى منين جاكـم
يا علكـم فـي حاميـات الاصاويـب
ياللـي علـى الوالـد خبيـث لغاكـم
قصيتكـم واسنـدت وادي سلاحـيـب
ولقيـت بالصبخـا مدافـيـق مـاكـم
يا عيـال بعتونـي بصفـر العراقيـب
مـا هـي حقيقـه سـود الله قراكـم
يالله عسـى عماركـم شمسهـا تغيـب
ويعتـم قمركـم ثـم يعتـم سمـاكـم
شفت الجفا والحيف والغلب والريـب
بأطلوعـكـم لابـيـض الله قـراكـم
لابد ما هو عـاوي(ن) دونـي الذيـب
بالقبر ما فـرق طيبكـم مـن رداكـم
مانـي بفاضحكـم وسـط الاجانيـب
بأعمالكـم يـدرون كــل اقربـاكـم
لو كـان تـدرون الـردى والمعاييـب
صرتوا مع المخلـوق مثـل اخوياكـم

 إضافة رد

 سعد العقيدي
 01:48 PM
 26.11.10

وبالوالدين إحسانا

بارك الله فيك أخوي الغالي أبو رياض

وحقاً (إن كيدهن لعظيم)

تقبل مروري وتحياتي

 إضافة رد

 سارى الليل
 03:02 PM
 26.11.10

خذوا كـلام جحيـش مابـه نكاذيـب
مثـل السنـد مضمـون للـي وراكـم

الله يجزااك خير

ولك تحياتي

 إضافة رد

 محمد النجرس العقيدي
 04:23 PM
 26.11.10

 إضافة رد

 أحمد القرعاني
 06:42 PM
 26.11.10

شرفتوني بمروركم أخي أبن نجرس

وأخوي أبو سيف وسعد العكيدي

وأخي ساري الليل لكم تحياتي مقرونه بالحب والموده

 إضافة رد

 دمعه حزن
 11:46 AM
 31.01.11

القصة هذي جميلة ومعبرة


صراحه قريتها اكثر من مره

بس فيها عبرة وعظه لمن اعتبر


وهذا القاء للقصيدة

بصوت

مشاري النبهان

http://www.youtube.com/watch?v=iEfLbW-7jwI



اجمل ما قرات من القصص

احمد القرعاني
كل الشكر لك

 إضافة رد

 أحمد القرعاني
 12:47 PM
 31.01.11

أشكر مرورج أختي دمعه

وتزويدك الموضوع القصيدة بالصوت

تقبل تحياتي وودي.

 إضافة رد

 سعد الهتيمي
 04:26 AM
 08.05.11

شكرا
على الطرح

 إضافة رد

 أحمد القرعاني
 01:36 AM
 09.05.11

شكرا لمرورك أخي سعد الهتيمي

تك مني أجمل التحايه والمحبه

 إضافة رد